Milli Məclisin deputatları Goranboyda fəaliyyət göstərən futbol klublarının üzvləri ilə görüşdülər.
Milli Məclisin deputatları Anar Məmmədov, Arzu Nağıyev və deputat, AFFA-nın vitse-prezidenti Rauf Əliyev “Kəndlərdə idmanı inkişaf etdirək” layihəsi çərçivəsində, Goranboy rayonunda oldular. Rayon İcra Hakimiyyətinin inzibati binasında deputatlarla görüşən İcra Başçısı Məhərrəm Quliyev, öncə qonaqları inzibati binada, Ümummilli Lider Heydər Əliyev və Möhtərəm Prezident cənab İlham Əliyevin Goranboy rayonuna müxtəlif dövrlərdə etdiyi səfərlərə həsr olunmuş fotosərgilərlə tanış etdi. Sonra qonaqlar rayon Olimpiya İdman Kompleksində idmanın müxtəlif növləri, o cümlədən futbolun inkişafı üçün yaradılmış mövcud əlverişli şəraitlə yaxından tanış oldular. Rayonda fəaliyyət göstərən futbol klublarının üzvləri ilə görüşən qonaqlar, Deputat Anar Məmmədovun təşəbbüsü və Azərbaycan Futbol Federasiyaları Assosiasiyasının dəstəyi ilə futbolçulara idman geyim-forma dəstləri və futbol topları təqdim etdilər.
