Goranboyda, Ümummilli Lider Heydər Əliyevin 101-ci ildönümünə həsr olunmuş “Heydər Əliyev siyasəti və Qarabağ amili: uğursuzluğu zəfərə çevirən müqəddəs amal” mövzusunda konfrans keçirildi.
Goranboyda, Ümummilli Lider Heydər Əliyevin 101-ci ildönümü ilə bağlı, rayon İcra Hakimiyyətinin Tədbirlər Planına uyğun olaraq, rayon İcra Hakimiyyəti və Xalq qəzetinin birgə təşkilatçılığı ilə “Heydər Əliyev siyasəti və Qarabağ amili: uğursuzluğu zəfərə çevirən müqəddəs amal” mövzusunda tədbir keçirildi. Tədbirdə, Goranboy rayon İcra Hakimiyyətinin başçısı Məhərrəm Quliyev, Xalq qəzetinin baş redaktoru Əflatun Amaşov, Akademik, Azərbaycan Milli Elmlər Akademiyasının Gəncə Bölməsinin sədri Fuad Əliyev, Xalq qəzetinin bölgə müxbiri, Əməkdar Jurnalist Hamlet Qasımov, bir qrup rayon ziyalıları və ictimai fəallar iştirak etdilər. Tədbir iştirakçıları öncə, Ümummilli Lider Heydər Əliyevin rayon mərkəzində ucaldılmış abidəsini və Heydər Əliyev Mərkəzini ziyarət etdilər. Sonra tədbir YAP rayon təşkilatının inzibati binasının akt zalında davam etdirildi. Tədbirdə Ümummilli Liderimizin və bütün şəhidlərimizin əziz xatirəsi 1 dəqiqəlik sükutla yad edildi və Ümummilli Liderimizin dövlət idarəçiliyi fəaliyyəti ilə bağlı videoçarx izlənildi. Tədbirdə çıxış edən icra Başçısı Məhərrəm Quliyev və digər ziyalılar vurğuladılarki, Azərbaycan xalqının Ümummilli Lideri Heydər Əliyev öz xalqını zamanın mürəkkəb tarixi-siyasi sınaqlarından uğurla çıxarmış və ardıcıl mübarizə apararaq onu müstəqilliyə qovuşdurmuş qüdrətli şəxsiyyətdir. Azərbaycan xalqı yeni əsrə və yeni minilliyə məhz Heydər Əliyev zəkasının işığında qədəm qoymuşdur. Davamlı yüksəliş yolunda inamla irəliləyən müasir Azərbaycan Heydər Əliyevin ideyalarının təntənəsidir. Heydər Əliyev - Azərbaycan xalqının böyük oğlu, müstəqil Azərbaycan dövlətinin qurucusu, Azərbaycan Siyasi Dövlət İdarəçiliyi Sisteminin yaradıcısı, azərbaycançılıq ideologiyasının və milli özünüdərkin banisidir. Azərbaycan mətbuatının inkişafı da məhz Ümummilli Liderin fəaliyyəti ilə sıx bağlıdır. Ümummilli Lider daim azad mətbuatın inkişafına və mətbuat işçilərinin müstəqil fəaliyyətinə xüsusi önəm vermişdir. Müstəqil Azərbaycan Ulu Öndərin indiki və gələcək nəsillərə əmanəti, onun zəngin və çoxşaxəli irsi isə xalqımızın milli sərvətidir.
