Goranboyda Med life Hospitalın fəaliyyəti ilə tanışlıq
Goranboy rayon İcra Hakimiyyətinin başçısı Məhərrəm Quliyev və Azərbaycan Respublikası Prezidentinin Administrasiyasının Ərazi-təşkilat məsələləri şöbəsinin sektor müdiri Emin Eyvazov Goranboy şəhərində yeni istifadəyə verilmiş Med life Hospitalın fəaliyyəti ilə yerində tanış oldular. Məlumat üçün bildiririk ki, ölkəmizdə həyata keçirilən uğurlu sosial-iqtisadi islahatlar Goranboy rayonunda da sahibkarlığın inkişafı üçün əlverişli mühit formalaşdırmışdır. Bunun sayəsində son dövrlər rayonda özəl istehsal müəssisələri, orta və iri sahibkarlıq obyektləri fəaliyyətə başlamışdır. Bu istiqamətdə həyata keçirilən əsaslı tədbirlərin nəticəsidirki, Goranboy şəhərində, 2023-cü ilin mart ayında tikintisinə başlanmış, inşasına ümumilikdə 15 milyon manat vəsait xərclənilmiş və ən müasir, yüksək keyfiyyətli tibbi avadanlıqlarla təhciz edilmiş özəl tibb müəssisəsi – Med life Hospital artıq əhalinin istifadəsindədir. 98 çarpayılıq Hospitalda ambulator, stasionar, cərrahiyyə, doğuş və təcili yardım şöbələri, o cümlədən ambulator şöbədə ginekologiya, travmotologiya, lor, oftalmologiya, bütün laborator müayinələr, hər növ ultrasəs müayinələri və radiologiya xidmətləri fəaliyyət göstərir. Burada 150 nəfər işlə təmin olunmuşdur.
