AZƏRBAYCAN RESPUBLİKASI
GORANBOY RAYON
İCRA HAKİMİYYƏTİ

Azərbaycan Respublikasının Prezidenti cənab İlham Əliyevin həyata keçirdiyi məqsədyönlü mədəniyyət siyasətinin nəticəsidir ki, son illər ölkəmiz bir sıra beynəlxalq konfrans və festivallara ev sahibliyi etməkdədir. Xalqımızın milli mədəni dəyərlərinin qorunması, təbliği, gələcək nəsillərə çatdırılması daim diqqət mərkəzindədir. Azərbaycan Respublikasının Prezidenti cənab İlham Əliyevin məqsədyönlü və uzaqgörən siyasəti nəticəsində ölkəmiz dünyanın mədəniyyətlərarası dialoq mərkəzlərindən birinə çevrilib və xalqımızın çoxəsrlik tolerant, mehriban birgə yaşama mədəniyyəti dünya sivilizasiyaları arasında münasibətlərin tənzimlənməsində və inkişafında nümunə kimi göstərilir. Son illər Bakıda Ümumdünya Mədəniyyətlərarası Dialoq Forumunun keçirilməsi ənənə şəklini alması bunu bir daha sübut edir. Belə Forumların keçirilməsində əsas məqsəd xalqları, sivilizasiyaları bir araya gətirməkdən ibarətdir. Prezident İlham Əliyevin dediyi kimi «Əsrlər boyu bütün mədəniyyətlər, dinlər və etnik qrupların nümayəndələri Azərbaycanda bir ailə kimi yaşamışlar. Bu, bizim böyük sərvətimizdir. Azərbaycan kimi ölkələrin nümunəsi yaxşı göstəricidir ki, multikulturalizm yaşayır və biz müsbət meylləri stimullaşdırmalıyıq».
Bu gün mədəniyyət sahəsinin inkişafı müxtəlif formalarda özünü göstərir. Çünki ildən-ilə mədəniyyət müəssisələrinin tikinti və əsaslı təmiri genişlənir, əhalinin mədəni istirahəti üçün hərtərəfli şərait yaradılır, mədəniyyət və incəsənət sahəsində istedadların aşkara çıxarılması, mədəni irsimizin qorunması və gələcək nəsillərə çatdırılması üçün geniş miqyaslı tədbirlər həyata keçirilir. Son illər 25 dövlət teatrının, 219 muzeyin, 35 rəsm qalereyasının, 3161 kitabxana-informasiya sahəsinin, 100-dən çox mədəniyyət saraylarının maddi-texniki bazası müasir tələblər səviyyəsində qurulmuşdur. Bölgələrdə Heydər Əliyev Mərkəzləri tikilmişdir. Artıq Azərbaycan mədəniyyətinin daha geniş auditoriyalarda təbliğinə xidmət edən genişmiqyaslı layihələr həyata keçirilir. Bu sahədə Heydər Əliyev Fondunun Prezidenti, İNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə milli-mənəvi və mədəni sərvətimizin qorunması, onun gələcək nəsillərə çatdırılması, xalq sənətkarlığının inkişafı, muğam sahəsində yeni istedadların üzə çıxarılması, eləcə də mədəni irsimizin müxtəlif sahələrində reallaşdırılan layihələr dövlətimizin mədəniyyət sahəsində həyata keçirdiyi siyasətə böyük dəstək kimi qiymətləndirilir.
Bir çox şəhərlərin müxtəlif xarakterik meyarlara görə mədəniyyət paytaxtlarının seçilməsi 2015-ci ildə də davam etdirilmişdir. 2015-ci ildə Şamaxı «Ədəbiyyat Paytaxtı», Qax «Milli Mətbəx Paytaxtı» elan edilmişdir ki, bu da mədəniyyət dəyərlərinin qorunması və inkişafına şərait yaradılması deməkdir.
Daha bir yenilik «Bölgələrdən Paytaxta» adlı mədəniyyət layihələrinə start verilməsi olmuşdur. Bu layihə çərçivəsində Masallı, Qəbələ, Gədəbəy, Quba, İsmayıllı, Şəki və Şəmkirin mədəniyyət kollektivlərinin Bakı şəhərinin ən nüfuzlu konsert salonlarında çıxışları müsbət qarşılanmış və böyük marağa səbəb olmuşdur.
2015-ci il mədəniyyət sahəsində çox möhtəşəm bir tədbirlə də yadda qaldı. «Bakı-2015» I Avropa Oyunları ərəfəsində keçirilən kütləvi mədəni tədbirlər Avropaya, eləcə də dünyaya bir daha sübut etdi ki, dövlətimiz sürətlə inkişaf edir. Azərbaycan xalqı qədim zəngin milli-mədəni sərvətlərə malikdir, qonaqpərvər, sülhsevərdir, tolerantdır, həm də idman ölkəsidir.
2015-ci ildə keçirilən beynəlxalq festivallarda Azərbaycan musiqisinin dünya miqyasında, möhtəşəm salonlarda səslənməsi qürur doğuran mədəniyyət hadisələridir. 2015-ci ildə ilk dəfə olaraq Cənubi Amerikada, Braziliyanın Rio-de-Janeyro şəhərində «Azərbaycan mədəniyyəti həftəsi» keçirilmişdir. «Muğam aləmi» IV Beynəlxalq Muğam Festivalının, Bakıda təşkil olunan VIII Beynəlxalq Rostropoviç Festivalı, VII Üzeyirbəy Hacıbəyli Beynəlxalq Musiqi Festivalının, Bakı Beynəlxalq Caz Festivalının keçirilməsi yadda qalan mədəniyyət tədbirlərindəndir.
2015-ci il milli kinomuzun tarixində də əlamətdar il olmuşdur. «Nabat», «Axınla aşağı», «Çölçü» bədii və «Lahıc» sənədli filmləri ayrı-ayrı festivallarda mükafatlar qazanmış, yeni ekran əsərləri beynəlxalq kino festivallarında uğurla nümayiş etdirilmişdir.
Qədim və milli ənənəyə malik Azərbaycan teatrı son iki ildə dünyanın 20-dən artıq ölkəsində keçirilmiş beynəlxalq tədbirlərdə iştirak edib. Respublikada kitab nəşri, kitabxana işi, milli ədəbiyyatın təbliği sahəsində də uğurlar əldə olunub.
Prezident İlham Əliyevin sərəncamları ilə hər il tanınmış yazıçı və şairlərin, mədəniyyət və incəsənət xadimlərinin yubileyləri qeyd olunur. 2015-ci ildə MDB üzrə keçirilən «Kitab sənəti» müsabiqəsində Azərbaycan kitabı böyük uğur qazanıb, mükafatlara layiq görülüb.

Azərbaycan Respublikasının Prezidenti cənab İlham Əliyev son 12 ildə ölkədə turizmin inkişaf etdirilməsini prioritet sahə hesab edərək bu istiqamətdə çox mühüm sənədlər imzalamışdır. Bu sənədlərdən mühüm əhəmiyyət kəsb edən «Azərbaycan Respublikasında turizmin inkişafına dair 2008-2016-cı illər üçün Dövlət Proqramı» uğurla icra edilir, turizm sahəsində yeni-yeni infrastrukturlar yaradılır. Dövlətimizin bu sahəyə qayğısının nəticəsidir ki, 2011-ci il Azərbaycanda «Turizm ili» elan edildi. İl çərçivəsində yeni layihələr reallaşdırıldı. Bu gün artıq Azərbaycan beynəlxalq aləmdə turizm ölkəsi kimi tanınır. Təsadüfi deyildir ki, Azərbaycanda hər il beynəlxalq turizm sərgisi təşkil edilir, bu sərgidə turizm sahəsində təcrübəsi olan ölkələr iştirak edir. Təkcə ötən ildə 80-dən çox mehmanxana və mehmanxana tipli obyektə xüsusi razılıq (lisenziya) verilib. Hazırda belə obyektlərin sayı 300-dən artıqdır ki, onların da yarıdan çoxu bölgələrdə fəaliyyət göstərir.
Bu gün Azərbaycan turizm ölkələri arasında turizm növlərinin müxtəlifliyi ilə seçilir. Buna biznes turizmini, istirahət turizmini, sağlamlıq turizmini və s. misal göstərmək olar. Eyni zamanda Azərbaycanda saysız-hesabsız tarixi abidələr, turizm marşrutları, xaricilərə tanıtmaq üçün zəngin milli mətbəximiz, turistlərin rahat dincəlmələri üçün beynəlxalq standartlara cavab verən turizm-istirahət mərkəzləri vardır. Bu sahənin inkişafı ilə bağlı kreditlər və subsidiyalar ayrılır. Məhz turizmin inkişafının nəticəsidir ki, ildən-ilə ölkəmizə turizm axını güclənməkdədir. Bakı şəhərində və bölgələrdə turistlərə çox yüksək səviyyədə xidmət göstərən obyektlər tikilmiş və tikilməkdədir.
Bakının ən məhşur brend şəbəkəli mehmanxanalarından «Four Seasons Hotel Bakı», «Hyatt Regency», «JW Marriot Absheron Bakı Hotel», «Jumeriah Bilgah Beach Hotel», «Qrand Hotel Europe», «Hilton Bakı», «Kempinski Hotel Badamdar» və digərlərini misal göstərmək olar. Regionlarda da bu tipli mehmanxana və otellərin sayı artmaqdadır. Naftalanda «Qarabağ SPA aud Resort» Hotel Kompleksi, Qəbələdə «Tufan» dağ-xizək yay-qış istirahət kompleksinin birinci mərəhələsi, «Qafqaz Yengicə Termal Hotel və SPA» Hotel kompleksi, Şamaxıda «Şamaxı Palace Platinum By Rixos» Hoteli istifadəyə verilib. Ötən il Bakı Olimpiya Stadionu, Su İdman Sarayı, Atçılıq Mərkəzi, avropa Oyuknlarının və növbəti böyük yarışların yüksək səviyyədə keçirilməsi üçün nəhəng tikililərdən başqa «Qafqaz Bakı Sport Hotel» mehmanxana kompleksi, «Bulvar-Hotel», «Dalğa Beach-Aqua Park» ailəvi istirahət mərkəzi, Qusarda «Park Chalet Shahdağ» Hoteli, Şabranda «Qalaaltı Otel SPA» müalicə-istirahət kompleksi və digər obyektlər işə salınıb.
Məhz görülən bu tədbirlərin nəticəsidir ki, 2005-ci ilğlə müqayisədə 2015-ci ildə turizm obyektlərinin sayı 2,2 dəfə artmış, ölkəyə gələn turistlərin sayı isə 2 milyon 160 minə çatmışdır.
2015-ci il rayonun mədəni həyatında bir çox yeniliklərlə yadda qalmışdır. İlk növbədə mədəniyyət müəssisələrinin maddi-texniki bazasının möhkəmləndirilməsi istiqamətində işlər davam etdirilmişdir. Goranboy şəhər, Hazırəhmədli, Sarov, Şəfəq, Nizami kənd mədəniyyət mərkəzlərində, Şəfəq, Tap Qaraqoyunlu, Borsunlu kənd kitabxana filiallarında, Mərkəzi Kitabxana Sistemində, rayon Tarix-Diyarşünaslıq Muzeyində əsaslı təmir işləri aparılmışdır. Rəsm Qalereyasının binasının tikintisi başa çatmaq üzrədir. Goranlı kəndində Elektron Kitabxana, Dəliməmmədli şəhər Uşaq Musiqi məktəbi üçün 8 otaqdan ibarət əlavə tədris korpusunun tikintisinə, Rus Borisi kənd Mədəniyyət mərkəzində və kitabxanasında əsaslı təmir işlərinə başlanılmış, hazırda davam etdirilir. Mədəniyyət müəssisələrinin inventar və avadanlıqlar, elektron informasiya daşıyıcıları ilə təminatı il ərzində diqqətdə saxlanılmışdır.
Hesabat dövründə Mədəniyyət və turizm şöbəsi tərəfindən bir çox rayon əhəmiyyətli tədbirlər keçirilmişdir. Ulu öndər Heydər Əliyevin doğum günü ilə bağlı 10 may – Gül bayramı, Goranboy rayonunun yaradılmasının 85 illiyi, 28 may – Respublika günü, Qərb bölgəsi üzrə ilk dəfə 6 rayonun iştirak etdiyi regional xalça sərgisi, Novruz şənliyi və digər tədbirlər rayonun mədəni həyatında yadda qalan tədbirlərdir.
Gənc nəslin milli-mənəvi dəyərlərə sadiqlik və azərbaycançılıq ruhunda tərbiyə olunmasında Heydər Əliyev Mərkəzində keçirilən tədbirlərin böyük əhəmiyyəti olmuşdur. İl ərzində bu mövzu ilə bağlı Mərkəzdə 24 tədbir keçirilmiş, 3114 nəfər Mərkəzin xidmətindən istifadə etmişdir. Azərbaycan xalqının zəngin mədəniyyətinin, tarixinin, folklor və etnoqrafiyasının təbliği və tanıdılmasında rayon və Xoylu kənd Tarix-Diyarşünaslıq Muzeylərinin imkanlarından istifadə olunmuş, il ərzində müxtəlif tədbirlər keçirilmiş, 3000-dən çox insan muzeylərin xidmətindən istifadə etmiş, hər iki muzeyin fondlarına daxil olmuş 52 maddi mədəniyyət nümunələri tamaşaçılara nümayiş etdirilmişdir.
51 nəfər xarici ölkə vətəndaşı muzey tamaşaçılarının sırasında olmuşdur. 2015-ci ildə Dövlət Rəsm Qalereyası tərəfindən 11 rəsm sərgisi təşkil olunmuş, gənc rəssamlardan Lamiyə Mustafayevanın, Çinarə Xəlilzadənin fərdi yaradıcılıq sərgiləri keçirilmişdir. Eyni zamanda Döılət Rəsm Qalereyasının fondunda saxlanılan rəsm əsərləri Naftalan şəhərində və Xocalı rayonunda nümayiş etdirilmişdir.
Əhalinin asudə vaxtının səmərəli təşkili məqsədilə yerli aktyorların və həvəskarların iştirakı ilə «Qəhrəmanlıq nümunəsi», «Hacı Qara», «Dəli Alı» əsərlərindən hazırlanmış tamaşalar göstərilmiş, «Fəryad, «Ruhların fəryadı», «Qatillə görüş», «Xoca», «Bəxtiyar», «Axırıncı aşırım» filmləri nümayiş etdirilmişdir.
2015-ci ildə rayonun turizm potensialından 16 mindən çox turist istifadə etmişdir. Turistlərin müraciəti nəzərə alınaraq Yuxarı Ağcakənd-Buzluq yolunda təmir işləri aparılmış, «Göyüşlü bulaq» adlanan ərazidə turizm-istirahət mərkəzi yaradılmışdır.
Əraziyə turistlərin daha çox cəlb edilməsi məqsədilə bukletlər və məlumat kitabçaları çap edilərək yayılmışdır. 2015-ci ildə mədəniyyət müəssisələrində keçirilən tədbirlərlə bağlı televiziya və kütləvi-informasiya mərkəzində 26 məlumat verilmişdir.
İstedadlı və qabiliyyətli uşaqların üzə çıxarılması və onların yaradıcılıq potensialının inkişaf etdirilməsi məqsədilə Uşaq Musiqi məktəblərinin imkanlarından maksimum istifadə edilmişdir. 2015-ci ildə Musiqi məktəblərinin bir qrup şagirdləri müxtəlif nominasiyalar üzrə respublika müsabiqələrində fəal iştirak etmişlər.
Goranboy şəhər Uşaq İncəsənət Məktəbinin şagirdlərinin əl işləri Bakı şəhərində rəssamlıq ixtisası üzrə keçirilən «Baharın rəngləri» adlı sərgidə nümayiş etdirilmişdir. Məktəbin rəssamlıq ixtisası üzrə III sinif şagirdi müəllimi Əzanə Qarayeva ilə Azərbaycan Dövlət Xalça Muzeyinə dəvət olunmuş, muzeyin təcrübəli toxucusu Lalə xanımdan ustad dərsi almışdır. Xoreoqrafiya ixtisası üzrə III sinif şagirdi Fərman Məcidov Bakı Xoreoqrafiya Akademiyasıqa dəvət olunmuş, respublikanın xalq artisti Yusif Qasımovdan ustad dərsi almışdır. Həmin ustad dərsləri respublika televiziyasında nümayiş etdirilmişdir.
Səfikürd kənd Uşaq Musiqi məktəbinin III sinif şagirdi Ceyran Abdullayeva və Şəbnəm Ələkbərova Xan Şuşinski adına II Respublika Muğam Festivalında fəal iştirak etdiklərinə görə Mədəniyyət və Turizm Nazirliyinin Fəxri Fərmanı ilə təltif olunmuşlar.
Xan Qərvənd kənd uşaq musiqi məktəbinin V sinif şagirdi İbrahim Aslanov «Uşaq və gənclər arasında xalq çalğı alətləri ifaçıları»nın III Respublika müsabiqəsində fərqləndiyinə görə Mədəniyyət və Turizm Nazirliyinin Tərifnaməsinə layiq görülmüşdür.
Qızılhacılı qəsəbə Uşaq Musiqi məktəbinin səs sinfinin şagirdləri Elşad Nəcəfov, Fərid Məmmədov Xan Şuşinski adına II Respublika muğam müsabiqəsində fəal iştirak etdiklərinə görə Mədəniyyət və Turizm Nazirliyinin Fəxri Fərman, tar ixtisası üzrə 5-ci sinif şagirdi Rəsul Hacıyev isə Xalq çalğı alətləri ifaçılarının III Respublika müsabiqəsində Diplom ilə, Borsunlu kənd Uşaq Musiqi məktəbinin şagirdi Şəfa Əsədova uşaq və gənclər arasında xalq çalğı alətləri ifaçılarının III Respublika müsabiqəsində, Dəliməmmədli şəhər Uşaq Musiqi məktəbinin xanəndəlik sinfinin şagirdi Cavanşir Məmmədov Xan şuşinski adına II Respublika Muğam Festivalında Tərifnamə ilə təltif olunmuşlar.
Ağamalıoğlu kənd Uşaq Musiqi məktəbinin şagirdi Hikmət Kazımovun rəsm işləri BMT-nin təşəbbüsü ilə Çexiya Respublikasında keçirilən beynəlxalq müsabiqədə birinci yeri tutaraq Diploma, məktəbin xanəndəlik sinfinin şagirdi Ömər Orucov Xan Şuqinski adına III Respublika Muğam Festivalında Diploma, məktəbin tar sinfinin şagirdi İlqar Cəfərov xalq çalğı alətləri ifaçılarının III Respublika müsabiqəsində Tərifnaməyə, məktəbin xanəndəlik sinfinin şagirdi Səadət Tağıyeva III Beynəlxalq Muğam Festivalında Diploma, məktəbin fortepiano sinfinin şagirdi Nuray Cəfərova Qara Qarayevin yubileyi ilə əlaqədar uşaq və gənclər arasında xalq çalğı alətləri ifaçılarının respublika müsabiqəsində Sertifikata layiq görülmüşdür.